Колеги од Секторот за производство при АД ЕСМ учествуваа на јавната расправа организирана од Министерството за енергетика, рударство и минерални суровини, на која беа презентирани правилата за гаранциите за потекло (GOs) на електрична енергија во Македонија. Министерката за енергетика, рударство и минерални суровини, Сања Божиновска, истакна дека овие гаранции ќе овозможат транспарентен и одржлив енергетски пазар и ќе обезбедат јасен доказ за потрошувачите дека користат енергија од обновливи извори.
„Ова не е само техничка реформа – ова е промена која ќе ги поттикне граѓаните и компаниите да избираат зелена енергија“, нагласи Божиновска, додавајќи дека гаранциите за потекло ќе овозможат домашните компании да се натпреваруваат на европскиот пазар, каде што побарувачката за енергија од обновливи извори е се поголема.
Во април, започнува официјалното издавање на гаранциите за потекло, кои ќе бидат достапни само за електроцентрали кои користат обновливи извори и се запишани во Регистарот на Министерството за енергетика, рударство и минерални суровини. Овој чекор претставува значаен напредок во реализацијата на зелената транзиција во Македонија, која е во согласност со европските стандарди и цели за одржлив енергетски развој.
