Управата за јавни приходи (УЈП) започна контрола на приходите од странство на македонските граѓани кои оствариле приходи од работа, хонорари или други извори надвор од државата. Во првата фаза на проверка се опфатени приливите за периодот од јуни до крајот на 2020 година, а контролата ќе продолжи и со приходите од 2021 година до сега.
Според УЈП, во периодот од јуни до декември 2020 година околу 4.000 физички лица не го пријавиле и не го платиле данокот на приходи што подлежи на оданочување. Контролата има за цел граѓаните прво доброволно да се усогласат и да поднесат електронски пресметки. Досега, 462 лица доброволно го пријавиле данокот, во вкупен износ од 3.925.678 денари (63.832 евра), а платиле 2.592.483 денари (42.154 евра). За 48 лица, УЈП утврдила данок од 349.193 денари (5.677 евра).
Директорката на УЈП, Елена Петрова, истакна дека низ анализите и вкрстувањето на податоци биле забележани трендови кај граѓани кои привремено работат во странство, како и кај приредувачи на игри на среќа. Тие ќе треба да платат данок од 10 проценти на своите приходи доколку се даночни обврзници во Македонија.
На оданочување подлежат приливите од:
- доход од работа (плата, хонорари, интелектуални услуги, фриленс),
- доход од закуп (вклучително и преку платформи како Airbnb и Booking.com),
- капитални добивки (продажба на имот, криптовалути, хартии од вредност),
- доход од капитал (дивиденди, камати, други финансиски приходи),
- авторски права, добивки од игри на среќа и други видови доход.
Приливи што не подлежат на данок се оние добиени како подарок, семејна поддршка или трансфери преку сервиси како Western Union, Ria, Moneygram и слични.
