Томчо Стојанов го загуби својот син, Андреј, во трагичната несреќа која се случи во дискотеката во Кочани.
Со голема болка, таткото на настраданото момче даде изјава пред новинарите, држејќи ја во раце фотографијата на својот син, кој за само три дена од несреќата ќе го прославел својот 25-ти роденден.
Стојанов сподели дека за пожарот дознал од другарката на својот син која живее во Штип.
„Таму настана катастрофа, мојот син помагаше, спасуваше други, во стампедото беше прегазен и мојот син настрада. За три дена требаше да наполни 25 години, сега на 19-ти, а тој вчера почина.“
„И што да ви кажам, болките наши никој не може да ги спречи. Тоа е трагедија, неорганизирано, во име на парите што се правеше. Ако треба 200 луѓе, таму имаше 1200, сè тоа на црно. Кој ќе ни го врати мојот син, кој“ – вели тој низ емоции.
Томчо изјави дека има и ќерка која живее во Германија. „Таа е сама, како ќе биде и како ќе стигни денес тука. Што ќе види, како ќе ја дочекаме и како ќе ѝ кажеме. Тоа е уште поголема трагедија“ – дополни тој во својата изјава.
