Хрватската полиција објави нови детали за тешката сообраќајна несреќа што се случила во петокот околу 2:15 часот наутро во близина на Јастребарско, во која животот го загубил 19-годишен матурант.
Според официјалните информации, несреќата се случила во местото Горња Река, а автомобилот го управувал 19-годишен возач под дејство на алкохол. При тестирањето било утврдено дека имал 1,24 промили алкохол во крвта.
Во возилото имало уште тројца патници, сите на возраст од 19 години, кои според информациите не користеле сигурносни појаси во моментот на несреќата.
Според полициските информации, при влегување во лева кривина возачот не ја приспособил брзината на условите на патот, по што изгубил контрола над автомобилот. Возилото излетало од патот, завршило во канал и удрило во бетонски столб, по што било оттурнато кон насипот.
Од последиците на судирот, еден од патниците починал на местото на несреќата.
Друг 19-годишен патник се здобил со тешки повреди и бил пренесен на лекување во Клиничкиот болнички центар во Загреб.
Возачот и една девојка која се превезувала во автомобилот поминале со полесни повреди, соопштила полицијата.
По завршување на увидот, против младиот возач е поднесена кривична пријава, а тој веќе е предаден на надлежните органи и му се заканува затворска казна до 15 години поради последиците од несреќата.
