Најмалку девет лица го загубија животот, а повеќе од 25 се повредени во тешка сообраќајна несреќа што се случи во Зимбабве, кога товарен воз удрил во автобус на железнички премин.
Според информациите од полицијата и железничките власти, трагедијата се случила во градот Триангл, познат по производството на шеќер во јужниот дел на земјата. Меѓу жртвите има и две деца, додека голем број патници биле пренесени во болница со различни повреди.
Портпаролот на Националните железници на Зимбабве, Ендру Канамбура, соопштил дека според првичните наоди, возачот на автобусот не застанал пред железничкиот премин за да провери дали се приближува воз, со што ги прекршил безбедносните правила за преминување преку пруга.
Фотографиите објавени од локалните медиуми сведочат за силата на ударот. Автобусот останал целосно уништен покрај шините, со сериозно оштетена странична конструкција, додека делови од возилото биле расфрлани низ поширокото подрачје.
Несреќата повторно ја отвори дебатата за безбедноста во сообраќајот во Зимбабве, особено по серијата трагични инциденти во последниот период. Само пред неколку дена минибус кој превезувал ученици се запалил во централниот дел на земјата, при што животот го загубиле седум лица. Минатиот месец, пак, уште десет лица загинаа во судир меѓу автобус и товарно возило.
Надлежните служби продолжуваат со истрагата за целосно утврдување на околностите што довеле до една од најтешките железнички несреќи во земјата оваа година.
