Нови потресни сведоштва и детали излегуваат во јавноста по трагичната сообраќајна несреќа во бугарскиот град Драгоман, во која животот го загуби 18-годишната Милена. Во девојката удрил автомобил управуван од 26-годишен граничен полицаец, а според сведочењата на нејзините пријатели, она што се случувало непосредно по несреќата дополнително ја вознемирило јавноста.
Како што пренесуваат бугарските медиуми, повикувајќи се на изјави од очевидци, возачот по несреќата постојано ги повторувал зборовите: „Ништо не сум направил!“
Една од другарките на Милена, која била непосреден сведок на трагичниот настан, за бугарската телевизија Нова раскажала дека сè се случило за само неколку секунди и дека никој од присутните немал време да реагира.
„Немав време дури ни да ја испружам раката кон неа. Немаше можност да направиш ниту еден чекор. Автомобилот помина токму таму каде што стоевме“, изјавила девојката, опишувајќи ги последните моменти пред несреќата.
Според сведочењата на присутните, автомобилот се движел со голема брзина, за која се тврди дека надминувала 80 километри на час. Несреќата се случила на делница каде што дозволената брзина била ограничена на 50 километри на час.
Милена во моментот на несреќата била со своите пријатели, со кои се враќала од локален угостителски објект. Додека се движеле заедно, од зад нив слушнале возило кое брзо се приближувало.
Само неколку секунди подоцна автомобилот удрил во 18-годишната девојка, која ги загубила животот на местото на несреќата.
По трагичниот настан биле извршени проверки, при што било утврдено дека 26-годишниот возач имал дури 1,63 промили алкохол во крвта. Станува збор за граничен полицаец, против кого веднаш била поведена постапка.
Дополнително, тој бил дисциплински отстранет од работното место, а со одлука на надлежните му било одредено задржување во траење до 72 часа.
Во меѓувреме, семејството и пријателите на загинатата Милена бараат целосно расветлување на случајот и одговорност за трагедијата. Тие изразуваат загриженост дека постапката би можела да биде заташкана, поради што инсистираат сите околности да бидат темелно испитани и одговорните да ги сносат последиците.
Во Драгоман било организирано и бдение во спомен на младата девојка. На собирот се собрале луѓе кои сакале да ѝ оддадат почит на Милена и да ја изразат својата поддршка за нејзиното семејство.
Меѓу присутните била и жена која со своите зборови ја истакнала неправдата што ја чувствуваат најблиските, потсетувајќи дека девојката требало да ужива во младоста и да се подготвува за една од најважните прослави во животот.
„Наместо да има матура, сега ја нема“, изјавила таа.
Истрагата за несреќата продолжува. Надлежните органи треба да ги утврдат сите околности под кои се случила трагедијата, вклучително и брзината со која се движело возилото, состојбата на возачот и неговата одговорност за смртта на 18-годишната Милена.






