Вкупно 25 возачи биле лишени од слобода во текот на изминатото деноноќие на различни локации низ државата поради сомнение за сторено кривично дело „безобѕирно управување со моторно возило“, согласно член 297-а од Кривичниот законик.
Според информациите од Министерството за внатрешни работи, меѓу приведените има лица кои управувале возило без положен возачки испит, возачи кои биле под дејство на алкохол, како и лица кои седнале зад воланот и покрај активната забрана за управување.
12 ЛИЦА ВОЗЕЛЕ БЕЗ ПОЛОЖЕН ВОЗАЧКИ ИСПИТ
Од вкупниот број лишени од слобода, 12 лица управувале моторно возило без положен возачки испит. Меѓу нив се В.Р. (24), А.Н. (31), М.С. (32), Б.Д. (48), И.М. (22) и М.А. (20), сите од Скопје, како и двајца малолетници на возраст од 16 и 17 години од главниот град.
Во оваа група се и А.Џ. (32) од селото Ново Село, Ј.Б. (25) од селото Орланци, М.И. (44) од селото Бојане и еден малолетник од Кочани.
11 ВОЗАЧИ УПРАВУВАЛЕ ПОД ДЕЈСТВО НА АЛКОХОЛ
Полициските службеници лишиле од слобода и 11 возачи кои управувале патнички возила под дејство на алкохол.
Станува збор за К.В. (51) и Ѓ.С. (35), двајцата од Скопје, Р.К. (30) од Радовиш, В.М. (24) и Д.П. (21) од Штип, К.К. (41), Д.В. (47) и В.К. (43) од Прилеп, Б.Р. (63) од Неготино, Б.Т. (27) од селото Негорци, гевгелиско, и М.Б. (42) од Гевгелија.
ДВАЈЦА ВОЗЕЛЕ И ПОКРАЈ ИЗРЕЧЕНА ЗАБРАНА
Дополнително, В.С. (53) од Делчево и П.Д. (24) од Битола управувале моторни возила иако имале изречена забрана за управување.
Од МВР информираат дека по целосното документирање на сите случаи ќе бидат поднесени соодветни кривични пријави.
Министерството упатува апел до сите учесници во сообраќајот да ги почитуваат сообраќајните правила и прописи и да не управуваат возило без положен возачки испит, за време на важечка забрана или под дејство на алкохол. Одговорното однесување зад воланот е клучно за побезбеден сообраќај и заштита на животите.
