Во Дамаск, главниот град на Сирија, денеска се случи смртоносен терористички напад во православната црква „Свети Илија“. Според Министерството за внатрешни работи, бомбаш самоубиец поврзан со Исламска држава влегол во храмот за време на вечерната богослужба, отворил оган врз присутните и ја активирал експлозивната јакна.
Во нападот загинаа најмалку 20 луѓе, а 52 се повредени. Сведоци велат дека експлозијата одекнала силно, додека внатре имало над 350 верници. Постојат информации за втор напаѓач кој фрлил граната и отворил оган пред самата детонација.
Видеа од местото на нападот прикажуваат хорор сцени – уништени клупи, крв и паника. Сиријските власти остро ја осудија акцијата и најавија засилени безбедносни мерки за верските објекти.
Нападот ги обнови стравувањата за активноста на ќелиите на Исламска држава, иако групата одамна ја изгуби територијалната моќ. Претседателот Ахмад ел-Шараа се соочува со нов предизвик – да ја заштити религиозната разновидност на земјата под новата исламска власт. Истражувањето за инцидентот е во тек.
