Драмата во Основниот кривичен суд достигна точка на вриење! Стојанче Јовановски, обвинет дека ја навел на самоубиство сопствената сопруга Ивана – која заедно со својата ќерка Катја трагично загина по пад од балкон – денеска пред судот изнесе шокантни тврдења кои го менуваат погледот на целиот случај.
Јовановски во својот исказ наслика портрет на семејна идила која се претворила во пекол полн со прељуби, уцени и тајни следења. Тој тврди дека сè започнало со пораки и видеа што ги пронашол во нејзиниот телефон, а кои биле поврзани со нејзин колега. Но, најшокантниот дел од сведочењето е признанието за наводна монструозна уцена. Според него, Ивана му признала дека била принудена да му даде клуч од возилото на извесен Мартин Саздов, бидејќи тој ја уценувал со интимни снимки!
„Ми подметнаа дрога за да ме уништат“, изјави обвинетиот, раскажувајќи како почнал да ја демне сопругата низ скопските населби. Тој опиша како ја гледал Ивана во возилото на Саздов и како мајката на Мартин му потврдила дека неговата сопруга ноќевала кај нејзиниот син, додека малата Катја била оставена кај бабата.
Од нормален живот во нов стан купен во 2021 година, до крвав крај на 2 март – Јовановски пред судијата се обиде да ја префрли вината на трети лица и на притисокот под кој се наоѓала неговата сопруга. Дали овие тврдења се очаен обид за одбрана или вистинската заднина на незапаметената трагедија? Судскиот процес продолжува, а јавноста со подзинати усти ги чека следните сведоштва за овој случај кој сè уште нема одговори на клучните прашања.
