Необични сцени вечерва се забележани во центарот на Белград, каде што сè поголем број граѓани излегуваат на улиците и слават по објавувањето на првичните изборни резултати во Србија.
Според известувањето на телевизијата Н1, најголем дел од граѓаните се собираат на Теразије, каде што владее славеничка атмосфера.
Насобраните граѓани играат оро, додека возачите кои минуваат низ центарот свират со автомобилските сирени во знак на поддршка.
Иако бројот на луѓе на улиците постојано се зголемува, сообраќајот во моментот на известувањето сè уште се одвивал.
Во меѓувреме, внимание привлекле случувањата во Пионирскиот парк, во просторот познат како „Ќациленд“.
Поголема група луѓе, кои претходно престојувале во оградениот дел од паркот, го напуштила просторот и се упатила во правец на хотелот „Москва“.
Додека групата се движела низ центарот, дел од насобраните граѓани ѝ довикувале: „Каде бегате?“
Снимки од напуштањето на Пионирскиот парк беа објавени и на социјалните мрежи, меѓу другото и од БИРН Србија.
Настаните се случуваат во текот на изборната ноќ, откако Александар Вучиќ призна дека, според првичните проценки, неговата политичка опција ги изгубила парламентарните избори од студентската листа.
Засега нема официјални информации за причините поради кои групата го напуштила кампот, ниту потврда за идентитетот на сите лица.
Снимките од центарот на Белград сведочат за славеничката атмосфера, но и за напнатоста околу Пионирскиот парк, кој подолг период беше едно од најпрепознатливите места на политичките поделби во српската престолнина.
ПОГЛЕДНЕТЕ ГО ВИДЕОТО ТУКА
