Драматични сцени вечерва се забележани во центарот на Белград, каде што граѓани влегоа во Пионерскиот парк, во просторот на кампот познат како „Чациленд“, кој повеќе од една година беше ограден и недостапен за јавноста.
Според објавените информации, дел од присутните почнале да ги отстрануваат и уништуваат шаторите поставени во кампот, додека низ белградските улици продолжувало славењето по објавувањето на првичните изборни резултати, според кои победила студентската листа.
„Пионерскиот парк е ослободен!“, извикувале дел од граѓаните кои по приближно година и пол повторно влегле во оградениот простор.
Младите кои се собрале на локацијата го опишале кампот како симбол на одземањето на јавниот простор и порачале дека паркот повторно треба да биде достапен за сите граѓани.
Според медиумските извештаи, полицијата, која во текот на денот била присутна во околината, вечерва се повлекла од локацијата.
Исто така, се наведува дека во кампот претходно биле забележани поголем број мажи облечени во црно, но дека во моментот кога граѓаните влегле, тие повеќе не биле таму.
„Србија прогледа“, била една од пораките што се слушале меѓу присутните.
Настаните во Пионерскиот парк се случуваат во вечерта кога Александар Вучиќ го призна изборниот пораз на својата политичка опција, наведувајќи дека студентската листа, според првичните проценки, освоила меѓу 135 и 140 пратенички мандати.
Засега нема официјални информации за евентуално приведени лица или за целосниот обем на материјалната штета во кампот.
Снимките од Пионерскиот парк се шират на социјалните мрежи, додека прославите продолжуваат во српската престолнина.
