Јелена Ѓоковиќ, сопругата на најдобриот српски тенисер Новак Ѓоковиќ, се приклучи на јавните личности кои преку социјалните мрежи реагираа на изборната победа на Студентската листа и поразот на политичката опција предводена од Александар Вучиќ.
Јелена на својот инстаграм-профил сподели видео од прославите на улиците во Белград, по објавувањето на изборните резултати.
Станува збор за снимки од програмата на телевизијата Н1, на кои се гледаат граѓани кои масовно ја прославуваат победата на студентското движење во српската престолнина и во други градови.
Со споделувањето на снимката, Јелена го привлече вниманието на јавноста, особено поради фактот што нејзиниот сопруг Новак Ѓоковиќ и претходно јавно им даваше поддршка на студентските протести.
Познатиот тенисер во повеќе наврати споделуваше снимки од демонстрациите на социјалните мрежи, поради што беше изложен на критики од дел од поддржувачите на Вучиќ.
По изборниот пресврт во Србија, на социјалните мрежи реагираа и други познати личности од регионот.
Меѓу нив е и босанскохерцеговскиот бенд „Дубиоза колектив“, кој објави сатирично анимирано видео инспирирано од изборниот пораз на Вучиќ.
Во видеото е прикажан лик кој потсетува на српскиот политичар, како настапува во музичко шоу и пее песна во која се исмејува поразот на неговата партија.
Анимацијата е придружена со описот „Оде #ријалити“, а во неа се појавуваат и ликови кои асоцираат на други јавни личности од регионот.
Објавата на Јелена Ѓоковиќ е уште една реакција од јавниот живот на Србија по изборната победа на студентското движење, кое речиси две години организираше протести и бараше политички промени во земјата.
