Летот низ невреме не е прашање на храброст, туку на прецизни податоци и строги процедури. Воздухопловниот метеоролог Милош Вујовиќ објаснува дека метеоролошките информации играат клучна улога при секоја одлука што ја носат пилотите – од изборот на рута, па сè до тоа дали летот воопшто ќе се реализира.
Според него, доколку нема доволно безбедни услови, летот се откажува без двоумење. За разлика од прогнозите за граѓаните, во авијацијата нема нејасни термини – се користат исклучиво точни бројки за висина на облаци, видливост и интензитет на појавите. Посебен предизвик се грмотевичните бури, кои поради климатските промени стануваат сè почести и потешко предвидливи.
Најопасни се облаците од типот кумулонимбус, кои пилотите ги избегнуваат по секоја цена поради силни турбуленции. Турбуленцијата, како што објаснува Вујовиќ, е слична на пловење по разбранувано море – од благо тресење, до нагли промени на висината.
Пензионираниот пилот Стеван Игњатовиќ појаснува дека удар од гром во авион ретко претставува реална опасност. Благодарение на принципот на „Фарадеев кафез“, електричната енергија се распоредува по површината на леталото и се испушта преку специјални делови на крилјата.
Иако моментот може да биде непријатен – со блесок и силен звук – летот најчесто продолжува без последици. Само во случај на оштетување, пилотот одлучува за итно слетување. Безбедноста, велат експертите, секогаш е на прво место.
