Нов случај ги привлече вниманието на црногорските безбедносни служби откако двајца руски државјани беа уапсени на аеродромот во Тиват, а при проверката на нивниот багаж била пронајдена голема количина непријавена електронска опрема, пари и лекови. Подоцна, при претреси на објекти што ги користеле на црногорското приморје, биле пронајдени и околу еден милион евра, како и дополнителна ИТ-опрема.
Станува збор за Александар Михаилович Кругљански (31) и Александра Кругљанска (42), кои биле лишени од слобода на 23 септември на граничниот премин на аеродромот во Тиват, додека се подготвувале да се качат на лет за Тел Авив. Со себе имале дури 19 куфери во одделен багаж.
При деталната контрола, полицијата и царинските службеници пронашле 26.210 евра и 1.150 израелски шекели, како и голема количина непријавена електронска опрема и лекови. Од двајцата биле одземени и повеќе средства за комуникација, кои дополнително треба да бидат предмет на претрес и анализа.
Особено внимание предизвикала електронската опрема пронајдена во багажот. Според информациите на црногорските медиуми, во повеќе од половина од куферите имало уреди за кои постои сомневање дека би можеле да се користат за следење, надзор, шпионирање или откривање уреди за прислушување. Овие информации засега се дел од истрагата и не значат дека е утврдено за што точно била наменета целата опрема.
Меѓу запленетите предмети биле идентификувани GPS-тракер со микрофон и професионален детектор BugHunter Professional BH-04, уред наменет за откривање радио-предаватели, вклучително и скриени безжични микрофони и камери.
На фотографиите од запленетата опрема се гледаат и надзорни камери, системи за видеонадзор, компјутерски компоненти, мемориски уреди, кабли и различна друга електроника.
Случајот доби нова димензија откако полицијата извршила претреси и во објекти во Будва и Бар што ги користеле уапсените. Според неофицијални информации објавени од „Вијести“, таму биле пронајдени околу еден милион евра и дополнителна ИТ-опрема, за која исто така постои сомневање дека може да има врска со следење и надзор.
Според информациите од истрагата, двајцата имале туристички визи и во минатиот период повеќепати престојувале во Црна Гора.
Црногорската полиција официјално соопшти дека двајцата се осомничени за кривични дела поврзани со шверц и перење пари. Лишувањето од слобода било извршено по налог на државен обвинител од Основното државно обвинителство во Котор.
Истрагата продолжува во координација со надлежниот обвинител, Агенцијата за национална безбедност на Црна Гора, други безбедносни служби и меѓународната разузнавачка заедница. Целта е да се утврди потеклото и намената на пронајдените пари и опрема, како и сите околности поврзани со престојот на осомничените во Црна Гора.
