Подгоричката полиција поднесе кривична пријава против четири малолетни лица, на возраст од 16 и 17 години, поради сомневање дека во едно средно училиште во Подгорица физички го нападнале и претукале својот врсник, соопшти Управата за полиција.
Според информациите, насилството се случило пред неколку дена во училница, за време на краток одмор.
– Се сомнева дека малолетниците, по кратка вербална расправија, физички го нападнале оштетениот, нанесувајќи му повеќе удари со затворени тупаници во пределот на главата и телото. При нападот, оштетениот се здобил со лесни телесни повреди кои биле констатирани во медицинска установа – соопшти полицијата.
За инцидентот бил известен државниот обвинител во Основното државно обвинителство во Подгорица, кој наредил против осомничените да се поднесе кривична пријава во редовна постапка за сторено кривично дело насилничко однесување.
Од Управата за полиција истакнуваат дека ќе продолжат со активности насочени кон спречување на врсничко насилство и апелираат до родителите и наставниците да обрнат внимание на однесувањето на децата, со цел ваквите појави да се сведат на минимум.
Исто така, од училиштето во кое се случил инцидентот најавија дека ќе бидат преземени воспитни мерки против учениците учесници во настанот, согласно Статутот на образовната установа.
