Сопственикот на „Пинк медиа груп“, Жељко Митровиќ, најави големи промени во својата деловна империја, кои би можеле да резултираат со отпуштање на околу 1.000 вработени во повеќе компании од неговата групација.
Митровиќ ја соопштил одлуката преку социјалните мрежи по изборите во Србија, опишувајќи го денот како еден од најтешките во неговиот живот.
Веќе отпуштени 150 вработени
Првите отпуштања се случиле во Театарот „Одеон“, кој започнал со работа во септември 2024 година.
Според неговата објава, 150 вработени во театарот веќе останале без работа, откако била донесена одлука за распуштање на сите ансамбли.
„Еден од најтешките денови во мојот живот, исполнет со емоции, љубов, топлина и разбирање. Ги распуштив сите ансамбли во Театарот Одеон, 150 луѓе останаа без работа“, соопштил Митровиќ.
Отпуштања и во други компании
Тој најавил дека намалувањето на бројот на вработени нема да запре со театарот, туку ќе продолжи и во други компании во рамките на неговиот деловен систем.
„Во целиот систем ќе морам да отпуштам околу илјада луѓе, односно од десетина компании кои сè уште не успеале да застанат на здрави нозе“, навел сопственикот на „Пинк“.
Според неговото објаснување, станува збор за компании кои сè уште не постигнале задоволителни деловни резултати.
Засега не се соопштени конкретни информации кои други компании ќе бидат опфатени со отпуштањата, ниту во кој временски период ќе се реализира најавеното намалување на бројот на вработени.
Одлуката доаѓа непосредно по изборите во Србија, но Митровиќ во пренесената изјава не навел дека изборниот резултат е директната причина за отпуштањата.
