На аеродромот во Лајпциг, Германија, во текот на ноќта била пробиена заштитната ограда, а полицијата се сомнева дека непознато возило влегло на аеродромскиот простор во близина на паркирани руски товарни авиони „Антонов“.
Оштетувањето на оградата било откриено во саботата околу 23 часот, соопштила полицијата. По инцидентот, летовите на северната страна од аеродромот биле прекинати, а товарните авиони на компанијата „Амазон“ морале да слетуваат на јужната писта, објави германскиот весник „Билд“.
Портпаролката на полицијата, Тереза Леверенц, изјавила дека постои голема веројатност возило да ја пробило оградата и да навлегло во обезбедениот простор.
„Многу е веројатно дека некое возило ја пробило оградата. Сепак, при ноќната проверка на теренот не беа пронајдени ниту возило ниту неовластени лица во рамките на аеродромот“, изјавила Леверенц.
Таа најавила дека потрагата ќе продолжи и во текот на денот, додека северната писта ќе остане затворена за воздушниот сообраќај.
ПРЕТХОДНО БИЛ ПРОНАЈДЕН ДРОН СО ЕКСПЛОЗИВ
Инцидентот се случува по уште еден безбедносен настан на истиот аеродром. Во август, истражителите откриле дрон наполнет со експлозив во близина на пистата.
Според „Ројтерс“, германските претставници подоцна ја обвиниле Русија за тој случај, но Москва ги отфрлила обвинувањата.
Засега, според објавените информации, не е потврдено кој ја пробил оградата ниту дали инцидентот е поврзан со претходниот случај со дронот. Полициската истрага продолжува.
