Сериозни обвинувања за наводно изнесување државни пари од Србија преку граничниот премин Батровци, кон Хрватска, ја разбрануваа српската јавност.
Обвинителот на Врховното јавно обвинителство, Горан Илиќ, побара надлежните институции итно да ги проверат информациите според кои државни средства наводно биле пренесувани преку границата непосредно пред изборите во Србија.
Илиќ, кој раководи со новоформираната Комисија за обезбедување законитост во постапувањето на јавните обвинители, изјавил дека и самиот добил слични информации од повеќе извори.
„Наводно, сè обезбедува граничната полиција“
„Од повеќе извори слушнав дека на граничниот премин Батровци се изнесуваат државни пари. Безбедниот премин на парите наводно го обезбедуваат службеници на граничната полиција“, изјавил Илиќ за српскиот портал „Нова.рс“.
Тој нагласил дека надлежните обвинителства мора да побараат проверка на овие тврдења и, доколку се утврдат основи за сомневање, да преземат соодветни мерки.
Повод за неговата реакција била изјавата на Јово Бакиќ, кандидат од Студентската листа, кој тврди дека изнесувањето пари започнало еден ден пред парламентарните избори.
Бакиќ изјавил дека постојат начини парите да се вратат во Србија и евентуално одговорните да бидат санкционирани.
Засега нема независна потврда дека државни пари навистина биле изнесувани преку границата. Не се објавени ниту конкретни податоци за износот, лицата што наводно ги пренесувале парите или нивната крајна дестинација.
Novosadski informativni portal 021+2
Обвинителот Илиќ порачал дека институциите мора да реагираат и да утврдат дали постојат основи за покренување постапка.
