Жителите на една станбена зграда во Беч останаа во целосен шок кога на терасата од еден од становите се појави – Ферари. Станува збор за модел Ferrari 296 GTB, суперавтомобил чија вредност се проценува на околу 400.000 евра.
Снимки од настанот брзо се проширија на социјалните мрежи, прикажувајќи како возилото, со помош на кран, внимателно се подига и поставува на терасата. Соседите во неверување ги следеле случувањата, дел од нив мислејќи дека станува збор за рекламна кампања или уметничка инсталација.
Причината зад овој необичен потег е практична – сопственикот немал обезбедено гаражно место, па сакал да го заштити скапото возило од временските услови, кражба или оштетување. Затоа одлучил да го „паркира“ на терасата, веднаш до дневната соба.
Сепак, потегот предизвика бројни реакции и прашања за безбедноста на зградата, бидејќи терасата не е дизајнирана да поднесе тежина на автомобил. Надлежните служби ја испитуваат законитоста на постапката и потенцијалниот ризик за стабилноста на објектот и соседите.
За некои ова е луд или ексцентричен потег, за други – доказ за човечката креативност и желбата за индивидуална слобода кога станува збор за луксуз. Едно е сигурно: тераса-гаража за Ферари ретко се гледа, дури и во град како Беч.
