Авион на „Ер Србија“, кој вечерва полетал од Белград кон Москва, бил вратен во српската престолнина поради потреба од дополнителни безбедносни проверки поврзани со еден од патниците.
Според информациите што ги пренесува српски „Курир“, авионот го прекинал патувањето, а неговото враќање предизвикало големо внимание на социјалните мрежи.
Првично се појавиле информации дека летот бил прекинат поради ограничувањата на московските аеродроми, воведени во услови на пријавени напади со беспилотни летала.
Сепак, авиокомпанијата „Ер Србија“ соопштила дека причината за враќањето е поинаква.
Безбедносни проверки на еден патник
Од компанијата објасниле дека добиле информација од надлежните аеродромски служби која наложувала спроведување дополнителни безбедносни проверки поврзани со еден патник.
Поради тоа била донесена одлука авионот да се врати во Белград.
Дали во авионот имало тројца српски политичари?
На социјалните мрежи се појавиле непотврдени информации дека меѓу патниците наводно биле претседателот на Движењето на социјалистите Александар Вулин, директорот на „Србијагас“ Душан Бајатовиќ и претседателот на Српската народна партија Ненад Поповиќ.
Засега нема официјална потврда дека тројцата функционери навистина биле во авионот.
Според објавените информации, летот привлекол исклучително големо внимание на платформите за следење авиони, а неговата маршрута била меѓу најследените во светот.
Надлежните засега не соопштиле дополнителни детали за природата на безбедносната проверка.
