Вистинска драма се одвивала во Токио кога дваесет лица останале заглавени речиси шест часа во лифт на познатата кула Tokyo Skytree, откако системот запрел на околу 30 метри над земјата.
Лифтот, кој води до платформата за набљудување поставена на висина од 350 метри, застанал околу 20:15 часот. Патниците биле ослободени дури околу 2 часот по полноќ во понеделник, по повеќечасовна интервенција на спасувачките екипи, објави The Japan Times.
Компанијата што управува со кулата соопшти дека нема повредени и дека никој од заглавените патници немал здравствени проблеми за време на инцидентот. Во официјалното соопштение упатија извинување до сите кои биле дел од настанот, признавајќи дека долгото чекање предизвикало сериозен стрес и психолошка непријатност.
Покрај дваесетте лица во лифтот, уште околу 1.200 посетители останале заглавени на видиковецот. Од безбедносни причини биле стопирани и другите два лифта, па посетителите чекале приближно три часа за да се симнат. Тие се вратиле на земја околу 23 часот.
По инцидентот, Tokyo Skytree, која важи за една од најпопуларните туристички атракции во Јапонија, била затворена поради безбедносна инспекција. Надлежните започнале истрага за утврдување на причините за дефектот. Компанијата најави дека ќе им бидат рефундирани билетите на сите кои имале резервации за тој ден.
Според информациите од полицијата и операторот, кулата располага со четири лифта именувани по годишните времиња – пролет, лето, есен и зима. Во овој случај застанале лифтовите „есен“ и „зима“. Лифтот „есен“ бил празен, додека во „зима“ се наоѓале 20 патници, меѓу кои и две деца.
Во акцијата за спасување, пожарникарите го спуштиле лифтот „есен“ на истото ниво со заглавениот лифт „зима“. Меѓу страничните врати за итни случаи поставиле плоча од нерѓосувачки челик за да создадат премин. Потоа им помогнале на патниците да ја преминат оддалеченоста од околу 1,5 метар меѓу двата лифта, внимателно и под строги безбедносни мерки.
Слични дефекти во лифтовите на Tokyo Skytree биле регистрирани и во 2015 и 2017 година, но тогаш ситуациите биле решени за околу 30 минути. Секој од лифтовите е опремен со резерви за итни случаи, вклучувајќи вода за пиење, преносни тоалети, ќебиња и батериски ламби, што претставува дополнителна безбедносна мерка при вакви непредвидени настани.
