Во историски настан во египетскиот град Шарм ел Шеик, денес беше потпишан мировен договор за Појасот Газа, со кој според американскиот претседател Доналд Трамп, „конфликтот конечно е завршен“.
Трамп, кој лично присуствуваше на церемонијата, изјави дека ова е „неверојатен ден за целиот свет“, нагласувајќи дека договорот ќе стави крај на насилството што трае веќе 3.000 години.
„Ова е огромен чекор напред. Верувајте ми, со овој договор спречивме Трета светска војна“, изјави Трамп, додавајќи дека соработката меѓу САД, Египет, Турција и Израел го направила можно чудото на мирот.
По него, документот го потпишаа египетскиот претседател Абдел Фатах ал-Сиси и турскиот лидер Реџеп Таип Ердоган, додека израелската и палестинската страна, според извори, се согласиле на постепено разоружување и меѓусебни гаранции за безбедност.
Трамп се заблагодари и на италијанската премиерка Џорџија Мелони, опишувајќи ја како „силен владетел кој одлично ја врши својата работа“.
Со овој договор, Блискиот Исток би можел да влезе во нова ера на стабилност, а многумина веќе го нарекуваат потегот на Трамп „најголемиот дипломатски успех во современата историја“.
