Американскиот претседател Доналд Трамп потврди дека на неколку членови од својот кабинет им купил исти чевли од омилениот бренд „Флорсхајм“, објаснувајќи дека сакал да им даде поудобна и поелегантна опција. Необичниот потег прво беше откриен во извештај на „Волстрит журнал“, а потоа и самиот Трамп го потврди во радио-интервју, велејќи дека „малку се забавува“ со тоа и дека чевлите се убави и удобни.
Според објавените информации, станува збор за кожни чевли од марката „Флорсхајм“, кои чинат околу 145 долари по пар. Трамп, наводно, сам ги плаќал и понекогаш дури и ја погодувал големината на оние на кои им ги подарувал. Меѓу функционерите што наводно ги добиле се потпретседателот Џеј Ди Венс, државниот секретар Марко Рубио и министерот за одбрана Пит Хегсет.
Трамп во изјавата рекол дека никогаш не сакал членовите на кабинетот да шетаат во патики и дека кога некој ќе му каже дека има проблем со чевлите, тој едноставно му купува нов пар. Целата приказна предизвика и потсмев на интернет, особено по фотографии на кои се коментира дека чевлите на Марко Рубио изгледаат преголеми.
