Америка се соочува со драматична промена која може да „исфрли“ од игра повеќе од 190.000 камионџии. Новата регулатива на американското Министерство за транспорт веќе стапи во полна сила, а последиците се веќе видливи на секој чекор.
Главниот удар е насочен кон т.н. „недомицилни“ комерцијални дозволи (CDL). Според новите правила, возачите кои се во САД со статус на азиланти, бегалци или под програмата DACA, повеќе нема да можат да ги обновуваат или да добиваат нови дозволи за возење камиони и автобуси. Администрацијата тврди дека ова е прашање на национална безбедност, бидејќи историјата на возење на овие лица во нивните матични земји не може да биде верификувана.
- Имигранти со привремен статус: Дури и оние со легална дозвола за работа сега се соочуваат со „рампа“ за воланот.
- Прекршители на строгите контроли: Покрај имиграцискиот статус, новиот систем автоматски ги суспендира дозволите на сите кои имаат каков било прекршок во федералната база за алкохол и дрога.
- Јазична бариера: Се воведуваат и многу построги контроли за познавање на англискиот јазик – оние кои нема да го поминат тестот на патот, веднаш се исклучуваат од сообраќај.
Експертите предупредуваат дека ова дополнително ќе го зголеми веќе постоечкиот недостиг на возачи. Додека власта вели дека патиштата ќе станат побезбедни, транспортните компании стравуваат од ценовен шок и доцнење на пратките. Илјадници семејства чија егзистенција зависи од „километрите“, сега се наоѓаат во неизвесност додека нивните дозволи полека истекуваат без можност за продолжување.
