Русија откри кои услови мора да бидат исполнети за целосен прекин на војната во Украина

Мирното решавање на конфликтот во Украина мора да вклучува нејзин ненуклеарен и неутрален статус, укинување на дискриминаторските закони и признавање на суверенитетот и границите на Руската Федерација, изјави директорот на руската надворешна разузнавачка служба, Сергеј Наришкин, за новинската агенција ТАСС.

„Стратешките цели на Русија остануваат непроменети и по завршување на конфликтот. Основните услови за мировен договор се безусловен ненуклеарен и неутрален статус на Украина, целосна демилитаризација и ‘денацификација’ на украинската држава, како и укинување на сите дискриминаторски закони донесени по државниот удар во 2014 година“, изјави Наришкин.

Контактите со САД — позитивен сигнал

Наришкин ја оцени како позитивна самата можност за контакт помеѓу Русија и САД, истакнувајќи дека тоа претставува отстапување од ситуацијата што владееше за време на администрацијата на Џо Бајден.

Истовремено, тој посочи дека Русија целосно ги исполнува своите обврски поврзани со мораториумот на напади врз енергетската инфраструктура, за разлика од Украина, која, како што рече, секојдневно извршува удари врз вакви цели.

Загриженост за зголемена активност на НАТО

Наришкин додаде дека Русија и Белорусија бележат засилена воена активност на НАТО во близина на нивните граници, а неколку европски земји, според него, придонесуваат за дополнителна ескалација на тензиите поврзани со Украина.