Во Газа, голем број пациенти се приморани да се лечат во импровизирани шатори поради сериозното уништување на здравствениот систем од израелските напади, јавува Анадолу.
Снимките од Кан Јунис покажуваат како палестинските цивили лежат на душеци од сунѓер во шатори, бидејќи во болницата „Насер“ нема достапни кревети за новопристигнатите пациенти. Според Канцеларијата за медиуми на Владата на Газа, најмалку 38 болници и 96 здравствени центри се уништени, бомбардирани или принудени да престанат со работа. Само неколку објекти, како „Ал-Ахли“, „Ал-Шифа“ и „Ал-Акса“, делумно се функционални низ северната, централната и јужната зона на Газа.
Во болницата „Насер“, погодена од напад на 25 август, капацитетот е надминат, и секој ден пристигнуваат десетици пациенти. Многумина мораат да се лекуваат надвор, на студениот бетон, едни до други. Рами Хасан, еден од пациентите, изјавил дека бил застрелан во ногата додека се обидувал да земе хуманитарна помош на дистрибутивен пункт поддржан од САД и Израел, кој бил погоден во напад.
Од октомври 2023 година, израелските операции резултирале со речиси 63.500 загинати Палестинци, а енклавата се соочува со глад и хуманитарна катастрофа. Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото. Израел, исто така, се соочува со обвинение за геноцид пред Меѓународниот суд на правдата поради своите воени дејства во Газа.
