Американскиот претседател Доналд Трамп во понеделник покажа темна модринка на горниот дел од десната рака за време на потпишувањето на извршна наредба во Овалната соба. Модринката беше видлива и кога го прими својот јужнокорејски колега Ли Џе-мјунг, а претходно Трамп се обидуваше да ја прикрие со шминка.
Белата куќа и личниот лекар на претседателот објаснуваат дека модринката е резултат на честите ракувања и употребата на аспирин, кој е дел од стандардната терапија за превенција на кардиоваскуларни заболувања. И покрај тоа, јавноста шпекулира за можни здравствени проблеми, особено со оглед на тоа што Трамп неодамна откри дека има хронична венска инсуфициенција.
Ова не е првпат модринките на Трамп да привлечат внимание – тој периодично се појавува со слични знаци, што ги поттикнува шпекулациите за неговата здравствена состојба. Истата ситуација се случи и со поранешната британска кралица Елизабета II, која имаше видлива модринка на раката два дена пред нејзината смрт, што предизвика загриженост кај јавноста и медицинските експерти.
Белата куќа инсистира дека претседателот е во одлична здравствена состојба и дека модринката е безопасна последица од лековите и активниот начин на комуникација со јавноста.
