Италијанската влада донесе итна мерка со која привремено ги намалува акцизите на бензинот и дизелот, како одговор на новиот раст на цените предизвикан од кризата на Блискиот Исток. Одлуката веќе стапува во сила и ќе важи 20 дена, а според владините проценки, таа треба да донесе поевтинување од околу 25 центи по литар.
Покрај даночното олеснување, пакетот вклучува и мерки против ценовни шпекулации на бензинските пумпи, со цел да се спречи дополнително вештачко зголемување на цените. Италијанските власти нагласуваат дека станува збор за привремена и вонредна интервенција, донесена за да им се олесни товарот на граѓаните и компаниите во период на силен енергетски притисок.
Според уредбата, државата за оваа мерка издвојува околу 417 милиони евра, а дел од средствата ќе бидат обезбедени преку буџетски кратења. Паралелно, владата најави и дополнителна поддршка за транспортниот сектор, кој е меѓу најпогодените од скокот на цените на горивата.
Одлуката доаѓа во време кога нестабилноста на Блискиот Исток повторно ги потресе европските пазари на енергенси, а Италија се обидува брзо да го ублажи ударот врз домаќинствата и економијата. Во наредните денови ќе стане појасно дали ова краткорочно намалување ќе биде доволно за да го сопре новиот ценовен бран.
