Италијанската јавност е шокирана откако беше откриено дека онлајн платформа со стотици илјади корисници, „Фика“ (Phica), со години собирала и менувала фотографии на жени без нивна согласност, придружувајќи ги со непристојни и насилни коментари.
Меѓу жртвите се јавни личности како премиерката Џорџа Мелони, лидерката на опозицијата Ели Шлајн, инфлуенсерката Кјара Ферањи, како и членката на Европскиот парламент Алесандра Морети. Скандалот излезе на виделина кога локалната советничка Валерија Кампања открила дека нејзините фотографии се злоупотребени и поднела пријава.
„Со години, фотографии и клипови од ТВ-програми во кои учествував биле украдени, изменети и направени достапни за илјадници корисници“, изјави Морети, додавајќи дека коментарите не само што го нарушуваат нејзиното емоционално здравје, туку и ја загрозуваат безбедноста на многу жени.
Италијанската полиција започна истрага за платформата, а веб-страницата најави затворање и целосно бришење на содржината, признавајќи дека не успеале да го спречат токсичното однесување на корисниците. Скандалот следи по сличен случај со Фејсбук групата „Mia Moglie“, каде повеќе од 30.000 мажи тајно споделувале фотографии на своите партнерки со непристојни коментари.
