Докторите на Бајден размислувале за инвалидска количка, Белата куќа криела

Во новата книга „Оригинален грев“ од Џејк Тапер (CNN) и Алекс Томпсон (Axios), која ќе излезе на 20 мај, се открива дека здравствената состојба на американскиот претседател Џо Бајден во 2023 и 2024 година била толку нарушена, што неговиот тим разгледувал можност да користи инвалидска количка во случај на реизбор.

Фокусот на дискусиите биле проблемите со `рбетот и тешкотиите при одење, особено по падот во јуни 2023 на Академијата за воздухопловни сили. По инцидентот, тимот презел мерки – ја скратил патеката на настани, инсистирал Бајден да користи огради, и ги адаптирал јавните настапи.

Според авторите, лекарот Кевин О’Конор предупредил дека уште еден сериозен пад може да бара рехабилитација со количка. Но, употребата на количката била одложена од политички причини. Иако тимот на Бајден во јавноста ја минимизирал ситуацијата, извештаи укажуваат дека артритисот на `рбетот бил главната причина за неговите движења, не стара повреда на стапалото како што се тврдеше.

И покрај очигледните физички и ментални знаци на стареење, Бајден продолжи со кампањата сè до катастрофалниот настап во телевизиската дебата со Доналд Трамп во јуни 2024, по што демократските лидери почнаа да го повикуваат да се повлече. Три недели подоцна, тој ја прекина кампањата и ја поддржа Камала Харис како кандидат на Демократската партија.

Портпарол на Бајден за Axios изјави дека „немало влошување кое бара посебен третман“, додавајќи дека „претседателот бил транспарентен за својата состојба и бил ефикасен лидер и покрај физичките промени со возраста“.