Италијанската полиција уапси 11 лица, меѓу кои и пет малолетници, по откривањето на шокантен случај на брутално насилство што се случувало во римскиот кварт Масимино. Според истрагата, групата млади насилници ги киднапирала своите жртви, ги однесувала во изолирана гаража и таму ги подложувала на монструозни мачења.
Жртвите биле врзувани за рацете и нозете, а нападите вклучувале удирање со тупаници, железни шипки и други тврди предмети. Во одредени ситуации, истражителите утврдиле дека осомничените дури истурале врела вода врз делови од телата на жртвите, нанесувајќи сериозни изгореници и долготрајни повреди.
Полицијата наведува дека насилството било организирано и повторувано, а методите на мачење биле речиси идентични кај сите нападнати лица. Според првичните сознанија, мотивот најверојатно е поврзан со долгови за дрога и пресметки меѓу групи од локалното подземје.
По неколкунеделна истрага, карабинерите влегле во трага на групата и извршиле координирани апсења. Сите уапсени се Италијанци, а моментално се наоѓаат во притвор, каде се чека понатамошна правна постапка.
Властите ја опишуваат оваа истрага како една од најтешките во последните години кога станува збор за малолетничко насилство. Очекуваат дополнителни информации и нови сведочења кои може да ја прошират истрагата.
Жителите на Масимино се во шок, а локалните служби најавуваат зголемено полициско присуство и социјални контроли во регионот.
