Случајот што ја потресе цела Грција – и пошироко – добива нови и морничави димензии. 32-годишната Алжирка Варда Атруш, мајка на девојчето кое неодамна беше пронајдено мртво на плажата Едем во атинскиот кварт Палео Фалиро, сега се соочува со обвиненија за убиство со умисла на малолетен член на семејството, како и за нанесување тешки телесни повреди во семејни услови.
📍 Повеќе верзии, ниту една доследна
Од првиот момент кога случајот излезе во јавноста, мајката даваше противречни и нејасни изјави: прво тврдеше дека девојчето неколкупати паднало во бањата и не можело да се освести, па го поливала со вода; потоа кажа дека било живо кога го однела на плажа, но ѝ се лизнало од рацете; во друга верзија пак, го оставила во морето. Ниедна од овие изјави не кореспондира со медицинските и форензичките докази.
🔬 Форензички шок: детето било удавено и претепано
Судско-медицинскиот извештај е јасен – девојчето се удавило, и тоа на плажа, а не во море. Во белите дробови имало песок и морска вода, а на телото се забележани модринки, повреди на лицето, очите, челото и усните – повреди нанесени додека детето било сè уште живо. Тоа значи дека не станува збор за несреќа, туку за намерен чин.
Судскиот патолог Димитрис Галендерис потврдува: „Сите траги укажуваат на предумисла“. И уште посериозно – девојчето имало хронично метаболно нарушување, што се разгледува како можен мотив за убиство – обид да се “ослободи од товарот”.
🧳 Сценарио за бегство
Откако телото било пронајдено, Атруш се обидела да побегне. Била фатена со две од своите деца и кеса со облека додека се обидувала да ја напушти зградата. Истовремено, контактирала со амбасадата на Алжир, тврдејќи дека има само две деца и барала патни исправи за враќање дома. Побарала бесплатен билет и 500 евра од Меѓународната организација за миграции – се подготвувала за итно заминување.
Но, полицијата ја сопрела. Биле пронајдени клучни докази – облеката што ја носела, фрлена во кеса во грмушка, празната количка, билет за трамвај...
🎥 Снимките ја откриваат вистината
Надзорните камери во населбата ја покажуваат во саботата навечер, со три деца – едното непомично, покриено со капа, во количка. Неколку часа подоцна, ја снимаат како се враќа со празна количка и само две деца. Таксистот кој ја превезувал вели: „Изгледаше смирено. Не зборуваше грчки, си играше со телефонот.“
⚖️ Претходно досие и игнорирана закана
Атруш е недокументиран мигрант, која неуспешно аплицирала за азил двапати. Во 2022 веќе била пријавена за занемарување на дете – тогаш нејзиното 2-годишно дете било најдено само, пред зграда. Случајот бил затворен.
Сега се истражува дали властите направиле пропуст што тогаш не реагирале посериозно – можеби оваа трагедија можела да се спречи.
👶 Што ќе кажат другите деца?
Двете останати деца се згрижени и под психолошки надзор. Иако имаат само 4 и 5 години, нивните сведоштва би можеле да бидат клучни во процесот. Психолозите работат внимателно – траумите се длабоки, но вистината мора да излезе на виделина.
🧩 Зошто мртвото дете било облечено во костим за капење, а другите не? Зошто мајката го напуштила плажата? Зошто лажела за бројот на деца?
Одговорите допрва се бараат. Но едно е сигурно: зад оваа трагедија стои една мајка која се обидела да го избрише своето дете од реалноста. А во тоа – речиси успеала.
