Во рамките на интензивната операција против дистрибуцијата на наркотици, националната полиција на Перу заплени 3.407 килограми кокаин хидрохлорид во регионот Пиура, во северозападниот дел на земјата, со што го спречи испраќањето на товарот во странство, соопшти Министерството за внатрешни работи на Перу.
Претседателот на Перу, Хосе Хери, нагласи дека конфискуваната дрога потекнува од регионот ВРАЕМ (VRAEM – Valle de los Ríos Apurímac, Ene y Mantaro), познат по одгледување кока.
За време на операцијата, спроведена во средата, полицијата запрела камиони кои превезувале над 3.000 пакети со кокаин кон склад за банани за извоз, сместен околу 100 километри од пристанишниот град Паита.
Генералот Нилтон Сантос, началник на полициската единица за борба против наркотиците, истакна дека операцијата била спроведена во соработка со американската Агенција за борба против дрога (ДЕА). Според него, вредноста на запленетиот кокаин надминува 68 милиони долари (околу 58,4 милиони евра).
