Американскиот претседател Доналд Трамп јавно изрази целосна поддршка за Бенјамин Нетанјаху во трката за нов мандат како премиер на Израел. Во објава на својата социјална мрежа Truth Social, Трамп го опиша Нетанјаху како силен, храбар и исклучителен лидер, но и како еден од клучните партнери на САД во спротивставувањето на Иран.
Во пораката упатена до израелските граѓани, американскиот претседател порача дека Нетанјаху ја има неговата целосна и безрезервна поддршка.
„Ве молам, прифатете го ова писмо како моја целосна и безрезервна поддршка за Биби Нетанјаху во претстојната трка за премиер на Израел. Биби Нетанјаху никогаш нема да ве изневери!“, напиша Трамп.
Тој го нарече израелскиот премиер „голем воинствен премиер“ и истакна дека го смета за важен партнер во напорите за постигнување мир преку спротивставување на Иран.
ТРАМП СО НОВИ ПРЕДУПРЕДУВАЊА ЗА ИРАН
Во својата објава, Трамп се осврна и на долгогодишните тензии меѓу Иран, Израел и Соединетите Американски Држави. Тој тврдеше дека Иран веќе 51 година упатува закани кон Израел и САД, повикувајќи на нивно уништување.
Според американскиот претседател, би било само прашање на време кога Техеран би се обидел да ги претвори таквите закани во конкретни дејствија. Истовремено, тој оцени дека воените и финансиските капацитети на Иран значително биле ослабени.
„Ако брзо не го променат своето однесување, наскоро ќе ја завршиме работата“, порача Трамп, упатувајќи ново предупредување до иранските власти.
Американскиот претседател дополнително изјави дека, доколку Израел има лидер различен од Нетанјаху, САД можеби ќе мора самостојно да преземат задача за која тој смета дека треба да биде исполнета. Притоа нагласи дека не е наклонет кон такво сценарио.
„ГО ГЛЕДАВ ВО НАЈТЕШКИТЕ МОМЕНТИ“
Трамп ја образложи својата поддршка со тврдењето дека Нетанјаху покажал издржливост и лидерски способности во тешки околности, и покрај силното противење со кое се соочувал, вклучително и во самата Израел.
„Го гледав Биби во најтешките моменти. Обичните мажи и жени во такви околности би попуштиле под притисокот, но Биби не попушти. Напротив, стана уште посилен, а таков е и денес“, напиша американскиот претседател.
Тој додаде дека САД од Израел очекуваат токму таков партнер и ја истакна поддршката што Вашингтон му ја дал на својот блискоисточен сојузник.
Изјавата на Трамп претставува јасен јавен сигнал за неговата поддршка за Нетанјаху во пресрет на политичката трка за премиерската функција. Воедно, неговите пораки за Иран покажуваат дека безбедносните односи на Блискиот Исток и понатаму остануваат во центарот на неговата реторика.
