Звучи како научна фантастика, но е реалност. Научници од кинеската покраина Zhejiang развија генетски модифициран домат со необичен вкус – потсетува на пуканки со путер.
Во контролирани услови во лабораторија, истражувачите направиле прецизна измена во геномот на доматот. Наместо класично вкрстување, тие ги „исклучиле“ двата гена што ги потиснуваат ароматичните соединенија. Резултатот? Плод што изгледа сосема обично, но ослободува сладок, препознатлив мирис налик на свежо подготвени пуканки.
Проектот бил спроведен во лабораторијата „Сјангху“, при што истражувачите биле инспирирани од успехот на ароматичниот ориз, кој се продава по повисока цена од стандардниот. Според Сју Шенгчун од Институтот за биотехнолошки истражувања, целта била да се создаде производ што ќе понуди ново сетилно искуство и поголема пазарна вредност.
Доматите се една од најважните градинарски култури во светот. Само Кина во 2023 година произвела над 70 милиони тони – повеќе од една третина од глобалното производство. Со вакви иновации, земјата дополнително го зацврстува своето лидерство.
Прашањето што останува е: дали потрошувачите ќе прифатат домат што мириса како кино-сала? Ако судиме според интересот за новитети во храната, овој необичен плод можеби наскоро ќе стане вистински хит на пазарот.
