Голем пожар избувнал во петокот навечер во познатиот планински објект Келштајнхаус, лоциран во Берхтесгаден, Германија. Противпожарните екипи и другите служби за итни случаи пристигнале на местото откако пожарот бил пријавен околу 21:52 часот.
Според информациите од Полициската управа на Горна Баварија – Југ, гаснењето на пожарот било во тек. Интервенцијата била отежната поради тешкиот пристап до планинскиот објект.
За среќа, нема повредени лица
Според досегашните информации, во моментот кога избувнал пожарот, во објектот немало никого. Засега нема пријави за повредени, а причината за избувнувањето на огнот сè уште не е позната.
Надлежните служби продолжиле со интервенцијата, додека околностите под кои избувнал пожарот треба дополнително да се утврдат.
Објект со мрачно историско минато
Келштајнхаус бил изграден во 1938 година, а изградбата била завршена за само 13 месеци. Објектот бил подигнат по налог на Мартин Борман како подарок за Адолф Хитлер по повод неговиот 50-ти роденден.
За време на нацистичкиот режим, местото се користело за дипломатски и општествени средби на нацистичкото раководство. Сојузниците подоцна му го дале името „Орлово гнездо“, под кое е познат и денес.
До него се стигнува со планински автобус и посебен лифт
Од 1952 година, пристапот до објектот со приватни автомобили е забранет. Посетителите до него пристигнуваат со специјални планински автобуси кои минуваат низ пет тунели.
По пристигнувањето, следува поминување низ мермерен тунел долг 124 метри, по што посетителите влегуваат во луксузен лифт обложен со месинг, кој ги носи директно во зградата.
Денес, Келштајнхаус функционира како ресторан и претставува една од познатите туристички атракции во регионот. Особено е посетуван поради спектакуларниот панорамски поглед кон Алпите и околното езеро.
Засега не е познато колкава материјална штета предизвикал пожарот. Истрагата треба да ги утврди причините за инцидентот.
