Само неколку месеци пред почетокот на Светското првенство во фудбал 2026, се појавува неочекуван проблем што може да предизвика сериозни последици. Иран официјално започнал разговори со ФИФА со барање нивните натпревари да не се играат во САД, туку во Мексико.
Причината лежи во зголемените политички тензии и изјавите од Доналд Трамп, кои дополнително ја вжештија атмосферата. Од иранска страна дури се тврди дека безбедноста на репрезентацијата не може да биде гарантирана, што отвори прашање дали воопшто ќе патуваат во Америка.
Иранската федерација веќе најави дека разгледува алтернатива – сите натпревари да ги одигра во Мексико, иако роковите се исклучително кратки, а организациските промени речиси невозможни во оваа фаза.
Според распоредот, Иран треба да се соочи со Нов Зеланд, Белгија и Египет, и тоа на стадиони во Лос Анџелес и Сиетл.
Сценариото станува уште поинтересно ако Иран ја мине групната фаза – можно е директно да се соочи токму со селекцијата на САД, што дополнително ја подгрева неизвесноста.
Иако засега нема официјална потврда за повлекување, ваквиот потег би бил преседан во модерната историја на турнирот. Во меѓувреме, светската фудбалска јавност со внимание ја следи ситуацијата, бидејќи секоја одлука може да предизвика домино ефект.
