Во недела, 4 октомври 2026 година, во Скопје ќе се одржи „Виз Ер Скопски маратон 2026“, поради што ќе биде воведен посебен режим на сообраќај на повеќе сообраќајници во градот.
Настанот ќе започне во 08:00 часот, а во рамки на маратонот ќе се одржат трката на 5 километри, маратонот, полумаратонот и штафетната трка.
Кои улици ќе бидат опфатени?
Трката на 5 километри ќе започне од улицата „11-ти Октомври“, кај Зелен пазар, по што учесниците ќе продолжат по „11-ти Октомври“, булеварот „Крушевска Република“ и булеварот „3-та Македонска Бригада“. По свртувањето, трката ќе продолжи назад кон целта на плоштад „Македонија“.
Маратонот, полумаратонот и штафетната трка ќе започнат кај Собранието на Република Северна Македонија, по улицата „11-ти Октомври“, а трасата ќе продолжи преку улиците „Димитрие Чуповски“, „Митрополит Теодосиј Гологанов“ и „Војвода Васил Чакаларов“.
Потоа натпреварувачите ќе се движат по делови од трасата во Аеродром, вклучително и улицата „Васко Карангелевски“, булеварот „Јане Сандански“ и дел од булеварот „Кузман Јосифовски Питу“, по што ќе се вратат кон центарот на градот и целта на плоштад „Македонија“.
Сообраќајот ќе биде пренасочуван
Поради одржувањето на маратонот, Единицата за безбедност на патниот сообраќај ќе преземе мерки за посебен режим, а сообраќајот на дел од улиците ќе се пренасочува кон околните сообраќајници.
Од МВР апелираат до сите граѓани да ги почитуваат наредбите и насоките на полициските службеници кои ќе бидат распоредени по сообраќајниците каде што ќе се одвива маратонот.
Возачите се повикуваат да планираат дополнително време за патување и, доколку е можно, да ги избегнуваат улиците опфатени со трасата на трките.
Скопје утре ќе трча – а возачите нека бидат подготвени за изменет сообраќаен режим.
