Американската Американска агенција за храна и лекови даде зелено светло за револуционерен уред за третман на рак на панкреас – болест која важи за една од најсмртоносните. Станува збор за „Оптјун пакс“, технологија развиена од Novocure, која пациентот ја носи со себе додека ја прима терапијата.
Како функционира?
Уредот користи таканаречени „полиња за третман на тумор“ – слаби наизменични електрични полиња што се аплицираат преку лепенки поставени на абдоменот. Наместо да го напаѓаат целото тело како класичната хемотерапија, овие полиња го нарушуваат процесот на делба на канцерогените клетки, со минимално влијание врз здравото ткиво.
Најголемата предност? Терапијата е неинвазивна, а пациентите можат да продолжат со секојдневните активности додека го носат уредот.
Зошто ракот на панкреас е толку опасен?
Панкреасот се наоѓа длабоко во абдоменот, зад желудникот, што овозможува болеста да напредува без рани симптоми. Кога ќе се појават знаци како болка или жолтица, ракот често веќе се проширил. Дополнително, туморите создаваат заштитна „обвивка“ што ги прави поотпорни на класични терапии.
Според податоците на National Cancer Institute, иако овој тип рак претставува мал процент од дијагнозите, стапката на смртност е непропорционално висока.
Новото одобрување отвора надеж за пациентите кои долго време чекаа поефикасни и помалку агресивни опции. Медицинската заедница веќе го нарекува ова значаен чекор напред во борбата против една од најтешките дијагнози.
