Скопјани и утре ќе се соочат со дополнителен метеж во центарот на градот, откако Министерството за внатрешни работи најави посебен режим на сообраќај поради протестен марш што ќе започне во 12:30 часот. МВР официјално соопшти дека маршот ќе се организира како израз на незадоволство поради неспроведување на Законот за употреба на јазиците во правосудниот испит.
Според најавената траса, учесниците ќе се движат од плоштад „Карпошово востание“, по улицата „11-ти Март“, преку Камени мост, потоа по „Никола Вапцаров“, а протестот ќе заврши на улицата „Димитрие Чуповски“ пред Министерството за правда. Поради тоа, сообраќајот на овој потег ќе биде пренасочуван по околните улици, а Единицата за безбедност на патниот сообраќај ќе спроведе посебни мерки на терен.
Од полицијата апелираат возачите да бидат внимателни и да ги почитуваат насоките на униформираните службеници, бидејќи се очекуваат повремени застои и отежнато движење во централното градско подрачје. Во основа на протестот е спорот околу можноста правосудниот испит да се полага и на албански јазик, тема што веќе подолго време предизвикува политички и јавни реакции.
