Попладнево главниот град е погоден од силен ветер, кој предизвика сериозни последици во различни делови од Скопје. Делови од градот останаа без електрична енергија, а Центарот за управување со кризи информира за два големи пожари: еден на Скопска Црна Гора меѓу селата Црешево и Брњарци и втор меѓу селата Крушопек и Лока, како и за повеќе пожари на други локации.
Директорот на ЦУК, Мухамед Аљи, истакна дека се чека намалување на силата на ветровите за да се испратат воздухоплови за гаснење на пожарите. Иако нема пријавени повредени лица, невремето предизвика значителна материјална штета.
Во Чаир и Ѓорче Петров, како и на булеварот Партизански одреди во близина на бензинската пумпа „Окта“, се урнале кровови, додека на повеќе локации паднале дрвја, гранки и контејнери.
ЦУК информира дека надлежните служби внимателно ја следат состојбата и се во постојана координација со сите релевантни институции на терен.
Граѓаните кои претрпеле штети или забележале дополнителни ризици се повикуваат веднаш да се јават на бројот за итни повици 112.
