Преподобен Јован Рилски, еден од најпочитуваните светители на Православната Црква, се родил во местото Скрина, близу Софија, за време на владеењето на цар Борис. Иако потекнувал од сиромашно, но побожно семејство, уште од младоста го посветил животот на Бога. По смртта на родителите, се замонашил и се повлекол во пустината, каде што се подвизувал во пештери и најтешки услови, трпејќи напади од демони, разбојници и дури од своите роднини.
Подоцна се населил на Рилската планина, живеејќи во шупливо дрво и хранeјќи се единствено со билки и грав што, според Божја Промисла, растел во неговата близина. Долги години живеел во целосна осаменост, сè додека овчари не го пронашле. Оттогаш неговата светост почнала да се прочуствува меѓу народот. Луѓето доаѓале кај него поради исцелување и духовна утеха, а дури и бугарскиот цар Петар го посетувал за совет.
Со текот на времето, околу него се собирале монаси и ревнители, па така бил подигнат храм и манастир. Свети Јован се упокоил мирно на 18 август 946 година, на возраст од 70 години. По неговата смрт, моштите патувале низ Софија, Унгарија и Трново, за на крај да бидат положени во Рилскиот манастир, кој станал едно од најголемите духовни средишта на Балканот.
Со векови Рилскиот манастир претставува светилник на верата и место на чудотворна сила, особено во тешките времиња на турското ропство. Денес, Свети Јован Рилски е почитуван како голем духовен заштитник и пример за подвиг, смирение и непрекосновена вера.
