Владата донесе одлука за спроведување вонредни инспекциски контроли во сите легални фабрики за одгледување и производство на канабис за медицински цели на територијата на државата, со цел спречување на евентуално нелегално производство и негов пласман на црниот пазар.
Како што соопшти Влада на Република Северна Македонија, на денешната седница институциите биле задолжени во рамки на своите надлежности да извршат детални проверки кај сите правни лица со дозвола за производство на медицински канабис и во рок од 45 дена да достават извештај за наодите.
Целта на акцијата, според владините претставници, е да се спречи злоупотреба на лиценците и евентуално пренасочување на канабисот кон нелегалниот домашен и меѓународен пазар.
Воедно, Владата најави реактивирање на Меѓуресорската државна комисија за борба против недозволено производство, трговија и злоупотреба на дроги, која постои од 2017 година, но досега, според официјалните информации, речиси и да не била активна. Во ова тело членуваат претставници од повеќе министерства и институции, а со него претседава претставник од Министерството за здравство. Во иднина, од комисијата ќе се бараат редовни и детални извештаи за работата.
Паралелно со овие активности, Министерство за внатрешни работи на Северна Македонија и Обвинителство за гонење организиран криминал и корупција продолжуваат со истрага за можната поврзаност помеѓу петте тони марихуана запленети во Србија и големите количини што во изминатиот период беа одземени од магацините на домашни производители на медицински канабис.
Од Обвинителството информираат дека досега во рамки на опсежната акција се запленети над 40 тони марихуана од повеќе правни лица во државата и дека истрагата се води во тесна координација со полицијата и Комисијата за одобрување одгледување канабис при Министерството за здравство.
Надлежните институции најавуваат дека контролите ќе бидат темелни и дека секое утврдено прекршување на законите ќе резултира со соодветни кривични постапки.
