Линеарното зголемување е за усогласување со животниот стандард, вели директорот на Фондот за ПИОМ, Никола Мемов во неделното интервју на Радио Слободна Европа.
Тој смета дека тоа е исправно бидејќи цените подеднакво се покачени за сите.
Мемов вели дека исплатата на пензиите ќе биде редовна и уверува дека не се размислува за зголемување на старосната граница за пензионирање.
„Има две иницијативи од граѓани доставено до Уставниот суд и ќе видиме сега. Одлуката е пред донесување, односно трае јавната расправа околу ова значајно прашање во општеството. Сакам да истакнам дека измената на Законот за пензиско инвалидско осигурување беше донесена минатата година, на барање на пензионерите се донесе оваа одлука – усогласувањето на пензиите со швајцарскиот модел – процентуално се замени со линеарно зголемување на пензиите односно линеарно усогласување на пензиите на сите 345.000 пензионери“, вели Мемов.
Согласно измените на законот донесени оваа година, нагласи Мемов, во март пензионерите ќе добијат линеарно покачување од 1000 денари, додека во септември планирано е да се применат старите одредби од Законот за пензиско, каде што останува процентуалното усогласување согласно швајцарскиот модел.
За финансиската ситуација на Пензискиот фонд Мемов вели дека пензионерите можат да бидат спокојни и дека исплата на пензии ќе биде редовна и на први во месецот.
„Во буџетот за 2026 година предвидени се околу 117 милијарди денари за исплата на пензии. Меѓутоа, предвидено е и исплата на здравственото осигурување на пензионерите, исто така и транзициските трошоци кон пензиските друштва во вториот столб. За таа цел, за да биде системот заокружен и одржлив, Владата ќе обезбеди околу 62 милијарди денари, тоа е околу 1 милијарда евра, трансфери кон Фондот за пензиско и инвалидско осигурување за обезбедување навремена исплата на пензиите, на здравственото осигурување на пензионерите и транзициските трошоци кон вториот столб“, рече Мемов.
