Со доаѓањето на летото, многумина возачи ги заменуваат затворените чевли со папучи, сандали или дури возат боси. Иако ова звучи како пријатна и лесна опција, возењето со отворени обувки носи сериозни ризици по безбедноста. Главната опасност е што папучите или апостолките можат да се заглават меѓу педалата и стапалото, што во критичен момент може да предизвика загуба на контрола и несреќа.
Какви правила важат во Европа?
Европските автомобилски клубови направија компаративна анализа на закони и препораки за возење во отворени обувки низ континентот, и резултатите се изненадувачки различни.
- Во земји како Белгија, Босна и Херцеговина, Данска, Финска и Луксембург не постојат посебни правила за носење обувки при возење.
- Слична е ситуацијата и во Чешка, освен што возачите во јавниот превоз мора да носат затворени чевли.
- Во Италија, иако законот не го забранува возењето во апостолки, доколку се случи несреќа, полицијата може да процени дека несоодветната облека влијаела на возачот и осигурувањето може да одбие исплата.
- Германија нема директна забрана, но возачот мора да биде во состојба безбедно да управува со возилото, што значи дека обувките мора да имаат добра стабилност. Во случај на несреќа, осигурувањето може да ја намали компензацијата ако возачот бил непрописно облечен.
- Во Шпанија правилата се најстроги – возењето бос или во папучи се казнува со глоба од 80 евра.
- Во Словенија нема казна, но возачите се предупредуваат да користат затворени обувки или патики.
- Во Унгарија и Холандија нема конкретна забрана, но во несреќа, видот на обувките може да влијае на проценката за вина.
- Австрија нема казни, но ако полицијата смета дека несреќата можела да се избегне со правилна облека, може да следи постапка.
- Велика Британија нема строги правила, но законите бараат безбедна обуќа при возење и се можни казни.
- Хрватска нема прецизни прописи, но возачите се охрабруваат да носат затворени обувки.
Зошто е толку важно?
Научните истражувања покажуваат дека возењето во апостолки значително ги успорува реакциите и ја намалува силата при сопирање – што во итна ситуација може да значи разлика помеѓу живот и смрт. Дополнително, папучите можат да се заглават на педалите, што е директна опасност за предизвикување несреќа.
