Проектот „Македонијо, во срце те носиме“ продолжува да буди патриотски чувства и љубов кон нашата земја со нова композиција што допира до срцата на сите Македонци. Овој пат, тоа е „Мајко силна“, авторско дело на Александар Тарабунов, песна која долго време зрела во неговото творештво и конечно доби свој живот во рамките на овој значаен проект.
Музиката и текстот се дело на Тарабунов, додека аранжманот е создаден во соработка со маестро Николче Мицевски. Песната ја носи силната порака за припадност и гордост, преплетувајќи традиционални вредности со современи музички елементи. „Мајко силна“ ја истакнува вечната врска меѓу човекот и неговата земја и ја продолжува патриотската мисија на проектот, кој низ претходните песни успешно ја одразува љубовта кон македонските корени и заедничката иднина.
Под уметничка закрила на Скендеровски продукција, проектот има за цел да ја оживее македонската традиција со нови живописни музички бои и да ја збогати културната сцена. Досега, „Македонијо, во срце те носиме“ ја промовираше и врати во живот македонската музичка историја преку низа впечатливи песни на реномирани изведувачи.
Овој проект не е само музика, туку и патриотска мисија, културен завет и мост меѓу генерациите, инспириран од мудроста на предците и посветен на иднината на Македонија.
Уживајте во „Мајко силна“ и силниот глас на Александар Тарабунов!
Видео:
