Честер, малиот англиски град во областа Чешир, неодамна беше прогласен за најубав град во светот според студија која ја анализирала архитектонската хармонија на глобалните метрополи.
Истражувањето се базирало на „златниот сооднос“ (1:1.618), математичка формула која се смета за симбол на совршена пропорција и естетска привлечност. Резултатите покажале дека 83,7% од архитектурата на Честер одговара на овие идеални пропорции, што е највисок процент во светот.
Градот се издвојува со својата уникатна комбинација на римски ѕидини, средновековни црно-бели куќи и готска катедрала која доминира во центарот. „The Rows“ – двокатни трговски галерии од 14 век – претставуваат голема туристичка атракција и реткост во светски рамки.
На листата веднаш зад Честер се најдоа Венеција и Лондон, што го прави признанието уште поголемо за еден мал град кој успеал да се истакне пред најпознатите светски дестинации.
Честер денес е симбол на хармонија меѓу историјата и модерниот живот, а ова признание ја зацврстува неговата репутација како град кој треба да се посети барем еднаш во животот.
