Владата соопшти дека линеарното зголемување на пензиите за 5.000 денари на повеќе од 330.000 пензионери го исполнува даденото ветување. Според соопштението, со второто линеарно покачување од 2.500 денари се заокружува циклусот на зголемување на пензиите за вкупно 5.000 денари. Како резултат, најниската пензија во март изнесува 18.192 денари, додека просечната пензија изнесува околу 26.258 денари.
„За таа цел како Влада во Буџетот за 2025 година се обезбедени 15 милијарди денари за зголемување на пензиите и дополнителни 1,9 милијарди денари за здравствено осигурување на пензионерите, односно вкупно 17 милијарди денари“, се наведува во соопштението.
Од Владата посочуваат дека посветено работат на создавање сигурен и достоинствен живот за сите граѓани и дека продолжуваат кон реализирање на проектите и подобрување на животниот стандард.
