Нов инцидент во кој е вмешана американската Служба за имиграција и царинска контрола (ICE) предизвика големо внимание во јавноста, откако агент смртно застрелал 26-годишен Колумбиец за време на операција во сојузната држава Мејн.
Случајот се случил во градот Бидефорд, каде што агентите на ICE следеле адреса на која, според нивните информации, се наоѓал мигрант со налог за депортација. При обид да запрат возило кое излегувало од таа локација, дошло до пукање во кое возачот бил погоден и подоцна починал.
Од ICE соопштиле дека возилото се обидело да избега, а службеникот го употребил оружјето поради, како што навеле, загриженост за безбедноста на јавноста. Сепак, агенцијата не објави дополнителни детали за тоа зошто агентот проценил дека постои непосредна опасност.
Главниот обвинител на Мејн, Арон Фреј, изјави дека во инцидентот учествувал службеник од Одделот за операции за депортација при ICE. Агентот е ставен на административно отсуство додека трае истрагата за случајот.
Според првичните информации, возачот наводно се обидел да избега со автомобил во правец на службеникот, по што бил смртно застрелан. Името на жртвата не беше веднаш објавено, сè додека неговото семејство не биде официјално известено.
Дополнителна контроверза предизвикаа информациите дека убиениот можеби не бил лицето кое било цел на операцијата. Сенаторот од Мејн, Ангус Кинг, изјави дека првично бил информиран оти мажот бил предмет на имиграциски налог, но неколку часа подоцна добил ново известување дека тој всушност не бил лицето кое го барале властите.
Истрагата ја презеде Канцеларијата на генералниот инспектор при Министерството за внатрешна безбедност на САД (DHS), институција под чија надлежност е ICE.
Амбасадата на Колумбија потврди дека жртвата била колумбиски државјанин и побарала дополнителни информации од американските власти за околностите под кои се случила смртта.
Според Коалицијата за права на имигрантите во Мејн, станува збор за 26-годишен Колумбиец кој имал дозвола за работа во САД. Од организацијата изјавија дека тој бил дел од локалната заедница и дека неговиот живот завршил трагично.
По инцидентот, десетици луѓе излегоа на протест во Бидефорд, барајќи целосна истрага и одговори за случувањата.
Ова е втор сличен случај во краток период. Само неколку дена претходно, во Хјустон, Тексас, друг маж беше смртно застрелан за време на операција на ICE, откако властите соопштија дека се обидел да избегне апсење со возило.
Во тој случај, станувало збор за мексикански државјанин Лоренцо Салгадо Араухо, кој според DHS не ги почитувал наредбите за запирање и се обидел да удри агент, кој потоа пукал, наведувајќи самоодбрана. И тој случај останува предмет на истрага.
