Вишото јавно обвинителство во Белград подигнало обвинение против 18-годишниот Павле Ф., кој се товари за тешко убиство извршено на свиреп и подмолен начин врз 23-годишниот Тадија Пантиќ. Злосторството се случило на 22 ноември минатата година на подрачјето на Нов Белград, а обвинетиот се гони и за недозволено поседување и носење оружје.
Според наводите од истрагата, Павле Ф. делувал во соучесништво со уште едно лице, кое управувало со мотор и сè уште е во бегство. Двајцата пристигнале пред зградата во која живеел Пантиќ и, без да ги симнат кацигите, чекале да се појави. Кога жртвата излегла од зградата околу пладне, осомничениот му пришол одзади и испукал повеќе куршуми кон него.
И покрај обидот да избега, Пантиќ бил следен и повторно застрелан во близина на трафика, каде што подоцна им подлегнал на повредите. По извршувањето на делото, напаѓачите избегале со мотор, кој подоцна бил пронајден запален на подрачјето на Вождовац, што укажува на обид за прикривање на трагите.
Истрагата покажала дека осомничените се криеле во таканаречени „штек“ станови, сè до апсењето на Павле Ф. два месеца подоцна. За време на сослушувањето тој се бранел со молчење и моментално се наоѓа во притвор.
Обвинението веќе е доставено до Вишиот суд, каде се очекува негово потврдување. Случајот предизвика силни реакции во јавноста, а блиските на жртвата се простија со емотивни пораки, додека сведоци од местото на настанот сè уште се под силен впечаток од трагедијата.
